Manmaw Manau Wang kata shatsawm lam hpe hkumpat hkrum

Du na ra ai Nov. 26 - 28 laman hta Manmaw Muklum kaw Amyu sha ni a Manau poi kaba hpe Nlung Nnan sha hte Sut Manau ngu shingteng hte galaw sa wa na matu hkyen lajang nga ai re. Manmaw Muklum, Deng (2) Manau wang hta galaw sa wa na re majaw ya ten Manau Wang shatsawm jahtap ai lam, Ramma dabang ni hpaw galaw nga ai lam ni galaw shajin nga nga ai re. Ndai zawn galaw nga ai hta Manau Wang kata concrete lam nep ai ni galaw nga ai hpe Manmaw Ginwang Myen(Hk.Y.K) uphkang Du wa gaw Nov. 11 .2009 ya shana maga de Manau wang kata concrete nep shatsawm ai lam hpe n galaw lu na nga nna, sa hkumpat ai lam hpe chye lu ga ai. Dai majaw Poi shabyin shatai komiti kaw nna nep da sai lam ni hpe ga bai hkan kaput ai lam hpe mung chye lu ga ai.

Laiza kaw Balik hte Immigration sharin jawng yu poi galaw

Wunpawng Gumrawng Gumtsa Mungdan,Shanglawt Asuya, Mungchying Uphkang Dap kata kaw hpaw ninghtan da ai, Balik makan dap hte Immigration makan dap ni kaw nna laiwa sai August shata hta ningpawt ninghpang hpaji sharin jawng hpe hpaw sa wa ai lam chye lu ga ai. Laiza Muklum, Myu Lawt Gawknu hta 26 Sept. 2009 ya shani ndai Balik masat yan (8) hte Immigration masat yan (6) a jawng yu poi lamang galaw ai lam chye lu ga ai. Ndai jawng yu poi lamang hpe Wajau Nbwi Naw akyu hpyi ya nna, Mungchying Uphkang dap lithkam Salang kaba Lajawng Hkawng Lum kaw nna shatsam Mungga shaga ya ai hpe mung chye lu ga ai. Balik masat yan (8) hte Immigration masat yan (6) kaw nna awng pru wa ai jawngma ni hpe 26 Sept. 2009 ya shani kaw nna Mungchying Uphkang Dap kata magam lit ni hta shatsam bang ai lam mung chye lu ga ai.

Hpyen Du Shalat Jawng Masat Yan (3) Jawng yu

Wunpawng Mungdan Shanglawt Hpyen Dap,Dailawn Rung kaw nna hpaw da ai, Hpyen Du Shalat Jawng, Woichyai Bum, a Masat Yan (3) Jawng Yu Poi hpe 22.9.2002 ya shani jahpawt 7:00 am ten kaw nna galaw ai lam chye lu ga ai.Jawng Yu lamang hpe jahpawt 7:00 am ten hta akyu hpyi ap hpawng galaw nna, 8:00 am ten hta aya ap ya ai Daru Magam ahkang aya ap ya ai lam galaw ai lam hpe chye lu ga ai. Shani 11:00 am ten hta gaw Jawng Yu poi lamang hku nna galaw ai lam hte dai Jawng Yu Mungga hpe Wunpawng Mungdan Shanglawt Hpyen Dap, Tau Dap Awn Daju, Du Up Daju Sumlut Gun Maw kaw nna Mungga jaw ai lam chye lu ga ai.Masat Yan (3) Jawngma marai (50) jan Lat Du tsang hkam la let jawng yu ai lam chye lu ga ai.

Jawngma hte Buga Ramma hpyen Sharin lamang hpang

Laiwa sai shata kaw nna, Myen Gumshem Hpyen ni hte KIA hpyen dap ni shada Hpyen masa shaja hkat sa wa nga ai majaw Jinghpaw Mung kata majan bai byin wa na zawn rai masa ni pru wa nna, Buga masha ni yawng maja nga ai ten rai nga ai. Ndai zawn rai wa ai ten hta Mare buga sha na Jinghpaw Wunpawng Ramma ni hte Dakkasu shagu de jawng lung nga ai, Jinghpaw Wunpawng jawngma ni mung tinang KIA dap ginra nga ai shara ni de shani shagu du shang nga ding-yang rai ai lam chye lu ga ai. Ndai zawn rai du shang wa ai, Ramma ni hte Jawngma ni hpe Ningpawt Ninghpang hpyen hpaji sharin ya ai lam daini 19.9.2009 ya shani hta KIA dap daju ginra kaw galaw hpang ai hpaw poi galaw ai lam chye lu ga ai. Ndai Sharin lamang hpe matut manoi pang hte pang du shang wa ai Jawngma, Ramma ni hpe matut manoi pang hte pang Sharin jahpat sa wa na re lam mung chye lu ga ai. Bai Ningpawt Ninghpang Hpyen hpaji sharin ngut da sai, Jawngma ni hte Ramma ni hpe gaw Dabat wunkut alak mi hpaw sharin sa wa na re lam mung chye lu ga ai. Sammung ginra na Ramma, Jawngma ni gaw laiwa sai shata kaw nna pyi mahkawng nna, sharin taw nga sai lam hpe mung chye lu ga ai.Ndai Jawngma, Ramma ni gaw apnawng masing hku laksan shanglawm ai rai nna, apnawng ladaw gaw yawm dik lahkawng ning rai na lam hpe mung chye lu ga ai. Ndai masing hpe laiwa sai 2006 ning hta Jinghpaw Mung kata nga ai, Ramma uhpung, uhpawng shagu hte Sammung ramma hpung ni yawng jawm bawngban nna Amyu sha apnawng masing (National Service - NS) ngu shamying daidaw let laiwa sai 2007 ning hta shawng nnan numdaw hku marai 80 jan apnawng galaw nga sai lam hpe mung chye lu ga ai. Ndai National Service - NS hta tinang Jinghpaw Wunpawng Amyu sha sha raidum ai Ramma kaji kaba kadai raitimmung, tinang amyu a matu hpyen dap kaw nrai tim, jawng sara, tsi sara, magam dap shagu hta yawm dik lahkawng ning shanglawm apnawng sa wa ai lam galaw ga ngu jawm myit hkrum dawdan let galaw nga ai lam re hpe chye lu ga ai. Ya ten ndai National Service - NS lamang hta shanglawm na matu Jawngma, Ramma ni gaw shani shagu du shang wa ai majaw shara jahkrat galaw ai lam yak nga ai lam hpe mung chye lu ga ai.